Mar 14:32-42 | YomNWM | STEP | Bosi batula ku buangu beti tedila Ngetesemane. Yesu wukamba minlonguki miandi :

Mark 14:32-42

Yesu wusambila ku Ngetesemane

(Matayi 26.36-46 ; Luka 22.40-46)

32 Bosi batula ku buangu beti tedila Ngetesemane. Yesu wukamba minlonguki miandi :

—Lukala vava minu, ndiedi ku sambila.

33 Wunata Piela, Yowani ayi Zaki. Wutona mona kiadi ayi maniongo. 34 Bosi wuba kamba :

—Muelꞌama weka kiadi nate nduka mu fua. Lusiala vava ; luleka nkielo.

35 Wuyenda thama fioti, wufukama ayi wuyinika zizi mu tsi, wusambila Nzambi ti baka bubela muingi thangu yoyi yintatukila.

36 Buna wutuba : Aba ! Tata ! Kuidi ngeyo mambu moso malenda vangama. Thatudila mbungu yayi. Muaki bika sia ti boso bunzodidi vayi boso bu zodidi !

37 Wuvutuka vaba minlonguki miandi. Wuyenda babata balembo lekitulu. Buna wukamba Piela :

—A Simoni, wulembo leki e ? Wusi nunga ko mu leka nkielo mu thangu yimosi ko e ? 38 Luleka nkielo ayi lusambila muingi luedi bua mu phukumunu. Bila pheve yidi ayi luzolo lu mboti vayi nitu yidi yilebakana.

39 Wuyenda diaka ayi wubuela sambila lusambulu banga lolo katuama sambila. 40 Bu kavutuka diaka, wuyiza buela babata buna balekidi bila mesomatulu maba yawu. Basia baka diambu di nkumvutudila ko.

41 Bu kavutuka mu khumbu yintatu, wuba kamba ti :

—Lukidi leka ayi lulembo vundi e ? Bufueni. Thangu yifueni. Muana Mutu yekolo mu mioko mi bankua masumu. 42 Telamanu ! Tuendianu ! Bila mutu wowo wukundiekula fikimini.